பெண் ஆசையால் வாழ்வை இழந்த இயக்குனர்

 

சென்னையில் தங்கி 15 ஆண்டுகளாக குறும்படங்கள் எடுத்து வந்தவர் திருநெல்வேலியைச் சேர்ந்த இயக்குநர் ஜெயக்குமார் (46). இவருக்கு இன்ஸ்டாகிராம் வாயிலாகத் துணை நடிகை பூஜா அறிமுகமாகியுள்ளார். ஆரம்பத்தில் உதவி செய்வதாகக் கூறி பூஜாவிற்கு பணம் மற்றும் நகைகளைத் தந்து வந்த ஜெயக்குமார், நாளடைவில் அவரைத் திருமணம் செய்துகொள்ள விரும்பி வற்புறுத்தியுள்ளார். ஆனால், பூஜா ஏற்கனவே தேவா என்பவரைக் காதலித்து வந்ததால் ஜெயக்குமாரின் காதலை ஏற்க மறுத்துள்ளார். இருப்பினும், ஜெயக்குமார் விடாமல் பூஜாவைத் தொடர்புகொண்டு தொல்லை கொடுத்ததுடன், நெருக்கமான புகைப்படங்களை வெளியிடுவேன் என மிரட்டியதாகக் கூறப்படுகிறது. 

ஜெயக்குமாரின் இந்தத் தொல்லையைத் தாங்க முடியாமல் பூஜா தனது காதலன் தேவாவிடம் முறையிட்டுள்ளார். இதனைத் தொடர்ந்து, ஜெயக்குமாரைத் தீர்த்துக்கட்டத் தேவா ஒரு திட்டத்தைத் தீட்டியுள்ளார். சென்னையில் வைத்து கொலை செய்தால் போலீசில் எளிதில் சிக்கிக்கொள்வோம் என்று கருதிய அவர்கள், தேவாவின் உறவினர்கள் வசிக்கும் விழுப்புரம் மாவட்டத்திற்கு ஜெயக்குமாரை வரவழைக்க முடிவு செய்தனர். திட்டத்தின்படி, தன்னைத் தாத்தா வீட்டில் அடைத்து வைத்திருப்பதாகவும், உடனே வந்து தன்னை அழைத்துச் சென்றால் திருமணம் செய்துகொள்ளலாம் என்றும் ஆசை வார்த்தை கூறி பூஜாவே ஜெயக்குமாரை விழுப்புரத்திற்கு வரவழைத்துள்ளார்.

   

பூஜாவின் வார்த்தையை நம்பி ஆர்வத்துடன் விழுப்புரம் வந்த ஜெயக்குமாரை, தேவாவின் உறவினர்கள் சவுக்குத் தோப்பிற்கு அழைத்துச் சென்றுள்ளனர். அங்கு மறைந்திருந்த பூஜா, தேவா மற்றும் அவர்களது நண்பர்கள் சேர்ந்து ஜெயக்குமாரைச் சரமாரியாக வெட்டிக் கொலை செய்துவிட்டு சடலத்தைச் சவுக்குத் தோப்பிலேயே வீசிச் சென்றனர். கடந்த சில தினங்களுக்கு முன்பு அழுகிய நிலையில் கண்டெடுக்கப்பட்ட சடலத்தை வைத்துப் போலீசார் நடத்திய விசாரணையில், சிசிடிவி காட்சிகள் மற்றும் செல்போன் எண்களின் உதவியுடன் இந்தக் கொலைச் சம்பவம் வெளிச்சத்திற்கு வந்தது.

   

இந்தக் கொடூரக் கொலை வழக்கு தொடர்பாகத் துணை நடிகை பூஜா, அவரது காதலன் தேவா, நண்பர்கள் மற்றும் உறவினர்கள் என மொத்தம் 9 பேரை அரகண்டநல்லூர் போலீசார் கைது செய்துள்ளனர். இதில் இருவர் பள்ளி மாணவர்கள் என்பது குறிப்பிடத்தக்கது. கைதான அனைவரும் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர். ஒரு பெண்ணின் மீதான அதீத ஆசையினால் ஒரு குறும்பட இயக்குநர் தனது உயிரை இழந்த சம்பவம் திரைத்துறையினரிடையே பெரும் அதிர்ச்சியை ஏற்படுத்தியுள்ளது.

#fblifestyle